Чаллы мәктәпләренә 200 укытучы килде

Чаллы мәктәпләренә эшкә 200 гә якын яшь укытучы килгән. Аларның күпчелеген Чаллы дәүләт педагогия институтын тәмамлаучылар тәшкил итә. Шулай ук Башкортостан, Киров һәм Оренбург өлкәләреннән дә эшкә килүчеләр бар. Барлыгы бу уку елында укучыларга 7 меңгә якын педагог белем бирәчәк. 

Яшь педагоглар килүгә карамастан, мәктәпләр әле дә кадрларга кытлык кичерә. Нигездә, физика, химия, биология һәм рус теле укытучылар җитми. Өстәвенә, балалар саны да елдан-ел арта бара. Шул сәбәпле быел да Чаллыдагы 81 мәктәпнең 24ендә укыту ике сменада оештырылачак.