Чаллы театрында - «Сөяркә»

Бу атнада Аяз Гыйләҗев исемендәге Чаллы татар дәүләт драма театрында чираттагы премьера була.

Күренекле драматург Туфан Миңнуллинның «Сөяркә» әсәрен актер, яшь режиссер Фирдүс Сафин сәхнәләштерә. 

Ярату гөнаһмы? Ун ел буе сөяркә ролендә яшәгән Әнисә көннәрдән беркөнне шушы сорау алдында кала. Гөнаһлы мәхәббәт һәм иман чисталыгы арасындагы каршылык Хәбирне дә уйландыра. Адәм баласы соңга калып булса да тәүбәгә килерме, гөнаһның нәрсә  икәнлеген аңлармы – спектакльдә шундый фәлсәфир сорауларга җавап эзләнә.

Бу спектакльне Г.Камал театры да куйган иде. Төп рольләрдә Татарстанның халык артистлары Фирдәвес Хәйруллина, Алсу Гайнуллина, Илдар Хәйруллин уйнады. 

Чаллы театрында исә төп рольләрне Марсель Мөсәвиров белән яшь артистка Гүзәл Шәмәгсумова башкара. 

«Бик тырышабыз инде. Тамашачылар безнең «Сөяркә»гә нинди бәя бирер дип дулкынланабыз», – ди актер Марсель Мөсәвиров.