Чаллы торак йортларында капиталь ремонт – 52 процентка үтәлде

Чаллы торак йортларында капиталь ремонтны 1 сентябрьгә тәмамларга планлаштыралар. Эшләрнең шактый өлеше - 52 проценты башкарылды. Бу хакта эшлекле дүшәмбе киңәшмәсендә башкарма комитет җитәкчесенең беренче урынбасары Илья Зуев хәбәр итте. "Материаллар җитәрлек. Яңа лифтлар да кайтарылды", - диде ул. 

“Көн җылы торганда эчке һәм тышкы эшләрне төгәлләргә кирәк. Хәзер төзүчеләр өчен иң уңайлы вакыт. Ял көннәрендә дә эшләргә кирәк. Шимбә, якшәмбе – төзүчеләр, юл ясаучыларның эш көннәре. Октябрь, ноябрьдә яңгырлар башлангач ял итәрбез", - диде мэр Наил Мәһдиев. 

Исегезгә төшерәбез, быел Чаллыда 107 торак йорт төзекләндерелә. Капиталь ремонтка 1,374 миллиард сум акча бүленеп бирелде. Монда республика, шәһәр бюджетыннан тыш, милекчеләр акчалары да бар.