Чаллы хәзрәте ярдәм сорый

Чаллы хәзрәте Илгиз Шәйхинуровка ярдәм кирәк. Шушы көннәрдә ул Чаллының беренче автомобиль юлында (“Бахор” кафесы яныда) җитди юл-транспорт һәлакәтенә юлыкты. Ул утырган җиңел машина фура белән бәрелеште. Хәзер шәһәрдәшебез хастаханәдә ята. 

Хәзрәткә «Оча һәм умрау сөякләре сыну сәбәпле, операция ясаганнар. Табиблар аңа ай ярымлап ятып кына торырга кушканнар. Аннары аны кимендә 2 ай тернәкләндерү көтә», – дип хәбәр итә танышы, Казан хәзрәте Руслан Абдулин. 

Аның сүзләренчә, авария факты буенча ачыклыйсы бәхәсле сораулар бар. Хәзрәт идарә иткән машинага, арттан башка бер автомобиль килеп бәрелгән була. Шул сәбәпле дин әһеленең машинасы каршы як полоса чыгып китә.  Боларны исбатлау өчен адвокат яллау кирәк. Ә бу исә финанс мәсьәләсенә барып тоташа. 

Шулай ук зыян күрүче авария шаһитлары ярдәменә һәм видерегистратор язмаларына өметләнә.

Тагы да кызыклырак яңалыклар - "Шәһри Чаллы" газетасының Телеграмм каналында