Чаллыда балалар өчен Мэр чыршылары башланды

Бәйрәмнәр шәһәрнең төрле учреждениеләрендә узачак, беренчесе «Мастеровые» рус драма театрында булды. Балалар «Алиса, беги!» дип исемләнгән Яңа ел әкиятен карадылар. 

Шәһәр мэры Наил Мәһдиев: «Укуда, спортта, иҗтимагый тормышта уңышларга ирешкән мәктәп укучыларын «Мастеровые» рус драма театрының яңа бинасына чакырдым. Алар белән бергә без тарихка кереп баручы 2022 елга нәтиҗә ясадык һәм Яңа елга теләкләр уйладык», –  дип хәбәр итте. 

Театрның яңа бинасын гирляндалар белән бизәделәр, ә яшь тамашачыларны Яңа ел чыршысы һәм аниматорлар каршы алды.
Тамаша алдыннан Чаллы мэры Наил Мәһдиев балаларны сәламләде һәм аларның казанышларын билгеләп үтте. «Сезнең тырышлыгыгыз, укытучы, остаз, тренер һәм ата-аналарыгыз ярдәме белән сез укуда, спортта, мәдәнияттә билгеле бер биеклеккә ирешә алдыгыз. Сезгә кызыклы булган барлык өлкәләрдә без әти-әниләр белән сезнең уңышларыгыз белән горурланабыз», – диде ул.

Бәйрәм кунаклары - аз керемле гаиләләрдә тәрбияләнүче балалар, хәрби хезмәткәрләрнең ул-кызлары, иҗтимагый оешмалар активистлары һәм уку алдынгылары «Алиса, беги!» спектаклен  кызыксынып карадылар һәм татлы бүләкләр белән өйләренә кайтып киттеләр. 
Фотолар мэрның телеграмм каналыннан алынды