Чаллыдагы зур предприятие эшчеләре ач калачак?!

Чаллы суды агулану очрагы ачыкланган шәһәр предприятиесе ашханәсен япты. Хәзер ул 3 ай буе эшләмәячәк. Мондый хөкем карары ТР Роспотребнадзор идарәсе белгечләре шикаяте нигезендә чыгарылды. Исегезгә төшерәбез, 14 апрельдә предприятие ашханәсендә ашаганнан соң, 14 кеше хастаханәгә эләкте. 7 кешедә норовирус ачыкланды. 

Роспотребнадзор белгечләре тикшерү үткәрде. Аш-су бүлмәсенең санитар яктан канәгатьләнерлек булмавы, ризык әзерләгәндә пешекчеләрнең куллану вакыты чыккан һәм маркировкасыз азык-төлек кулланылуы да ачыкланды.  Шулай ук савыт-саба, инвентарь эшкәртүдә дә кагыйдә бозулар бар. Ашханәдә эшләүче 7 хезмәткәрдә норовирус таптылар. Бу хакта монда язып чыктык.