Чаллының яшь көрәшчеләре Үзбәкстанга барачак

5-8 майда Әстерхан шәһәрендә билбаулы көрәш буенча Россия беренчелеге узды. Анда Россиянең төрле төбәкләреннән килгән 28 команда, шул исәптән 335 көрәшче бил алышты. Бирегә 2007-2009 елгы кызлар һәм малайлар җыелды. Чаллы көрәшчеләре мактанырлык нәтиҗә күрсәтте. 

Ислам Әхмәтҗанов (45 кг авырлыкта), Хәсән Сибгатуллин (50 кг) 2 урын яуладылар. Фаяз Сибгатуллин (50 кг), Фазыл Сибгатуллин (55 кг), Алинә Зәйнуллина (57 кг), Азилә Фатыйхова (+70 кг) 3 урынны алдылар. 

Икенче урын яулаган көрәшчеләр сентябрь аенда Үзбәкстанда узачак Дөнья беренчелегендә катнашачак, диде татарча көрәш федерациясенең башкарма директоры Рамил Хисмәтуллин.