Әнвәр Нургалиевның туганы үлемендә гаепле 7 елга колониягә озатылды

Башкортостанның Югары суды Әнвәр Нургалиевның туганы, блогер Диана Сәфәрованың үлемендә гаепле Вадим Латыйповны 7 елга колониягә җибәрү турында карар кабул итте. Моңарчы мондый җәза төрен Чишмә районы суды да билгеләгән иде. Әмма гаепләнүче гаебен танымыйча, хөкем карары белән килешмәде – Югары судка мөрәҗәгать итте. Суд бер елга сузылды. 

Исегезгә төшерәбез, күпбалалы ана, блогер Диана Сәфәрованың гомере узган елның 9 маенда Башкортостанның Чишмә район үзәгендә юл-транспорт һәлакәтендә өзелде. Чит ил машинасы «кистерү» нәтиҗәсендә ул идарәне югалтып баганага бәрелде.  

«Диананың әти-әнисеннән, бездән, балалардан гафу сорап, гаебен таныса, ирегеннән мәхрүм ителмәс иде. Иң күбе шартлы рәвештә хөкем ителер иде», – ди Диана Сәфәрованың туганы, җырчы Әнвәр Нургалиев. 

Сүз уңаеннан, Диананың үлемендә гаепле кеше һәм аның туганнары бер тапкыр да балаларның, әнисенең хәлен белешмәгән.