Эшмәкәрләр маркетплейслар аша сатырга курка

Республикада “Вайлдберриз”, “Озон”, “Яндекс Маркет”, Казан Экспресс” маркетплейслары аша сатучылар саны 2 тапкырга арткан. Бу хакта ТР премьер-министры урынбасары, икътисад министры Мидхәт Шаһиәхмәтов хәбәр итте. Товарларны бирү пунктлары да 1,5 тапкыр күбәйгән. Республика бюджетына узган ел 3 миллиард сум кергән. 100 меңләп кеше эш урыны белән тәэмин ителгән. 

-    Динамика уңай. Әмма күп кенә эшмәкәрләр маркетплейслар аша сата башларга шикләнә. Дөрес, сатып алуга караганда, сатуы күпкә авыррак. Әмма Интернет аша сатуның мөмкинлекләре күп. Эшмәкәр товарын күпме кеше күрә, - ди ТР Рәисе каршындагы Эшкуарлар хокукларын яклау буенча вәкаләтле вәкиле Фәрид Габделганиев.

Эшмәкәрләр, бу өлкәдә тәҗрибәләре булмау сәбәпле, курка дигән фикер яңгырады брифингта. Шуңа күрә маркетплейслар аша сату буенча уку-укыту эшләре алып барырга кирәклеге турында ассызыклады Республика Рәисе ярдәмчесе. Моннан тыш, башка районнарга да чыгу максаты куела.