Йогышлы авырулар хастаханәсе белем өчен түләргә әзер

Йогышлы авырулар хастаханәсендә, ахырдан шунда эшкә урнашу шарты белән, медицина өлкәсендә белем алырга чакыралар.

“Хәзерге вакытта бездә максатчан рәвештә белем алган ике табиб эшли. Быел Ижевскидан тагын бер реаниматолог көтәбез. Без инде КГМУ һәм КФУга максатчан юнәлешләр буенча керәчәк 10 кешене җыйдык, һәм тагын дүртесе төрле белгечлекләр буенча ординатурага керәчәк”, - ди баш табиб Ришат Ногманов.

Хәзерге вакытта хастаханә кардиологлар, реаниматологлар, инфекционистлар, пульмонологлар, эпидемиологлар, педиатрлар һәм терапевтлар кебек белгечләргә мохтаҗ. Белгечләрне гел тулыландырып торырга кирәк, өлкән табиблар пенсиягә, яшьләр декрет ялына китә. Йогышлы авырулар хастаханәсендә эшләргә теләүчеләр, белем алу буенча килешү төзү өчен, учреждение җитәкчелегенә мөрәҗәгать итә ала.