КАМАЗның легендар бригадиры вафат

 КАМАЗның легендар бригадиры, Ленин ордены кавалеры Шәүкәт Хөснетдинов 77 яшендә вафат булды.

Хушлашу мәрасиме бүген, 9 июньдә, 12:30 сәгатьтә Яр Чаллының Ашыгыч медицина ярдәме хастаханәсенең (БСМП) мәетханәсендә узачак.

Шәүкәт Хәмит улы 1949 елның 1 августында ТАССРның Чистай районы Татар Талкышы авылында туган. Чистай авыл хуҗалыгын механикалаштыру техникумын тәмамлагач һәм Совет Армиясе сафларында хезмәт иткәннән соң, 1971 елда комсомол юлламасы буенча КАМАЗ төзелешенә килә.

Ул автомобиль заводында хезмәт юлын 1973 елда слесарь-җыючы булып башлый. Аның дүрт дистә еллык эшчәнлеге предприятиенең төп конвейеры белән бәйле була. 1976 елда Хөснетдинов слесарь-җыючылар бригадасын җитәкли, ул соңрак КАМАЗның иң яхшы бригадаларының берсенә әверелә.

Ул төзегән комсомол-яшьләр бригадасы социалистик ярышларда күп тапкырлар җиңү яулый һәм мактаулы исемнәргә лаек була. Коллектив предприятиедә беренчеләрдән булып «Янда бер артта калучы да булмасын» девизы астында комплекслы бригада планы буенча эшли башлый.

Шәүкәт Хөснетдиновның катнашында аның төп конвейерда эшләгән елларында якынча 1,7 миллион КАМАЗ автомобиле җыела.

Производство эшчәнлегеннән тыш, Хөснетдинов җәмәгать тормышында актив катнаша. Ул ике тапкыр ТАССР Югары Советы депутаты итеп сайлана, СССР профсоюзларының XVII съезды һәм XIX Бөтенсоюз партия конференциясе делегаты була.

Күпьеллык намуслы хезмәте һәм югары җитештерү күрсәткечләре өчен Шәүкәт Хөснетдинов «Хезмәттәге казанышлары өчен» медале, Хезмәт Кызыл Байрагы ордены, Ленин ордены һәм «КАМАЗ төзелеше ударнигы» билгесе белән бүләкләнә.

1995 елдан ул автомобиль заводында җитәкче вазифаларда эшли, ә 2003 елдан 2009 елга кадәр кабиналар җыю цехына җитәкчелек итә. Пенсиягә чыккач та, автогигантның иң танылган ветераннарының берсе булып кала.