Казан-Адлер поезды һәлакәткә очрады: 9 вагон рельстан чыкты

12.35 сәгатьтә Волгоград өлкәсендә Гремячая – Котельниково станцияләре арасында 491нче Казан – Адлер пассажир поезды һәлакәткә очрады: «КамАЗ» белән бәрелеште. Йөк машинасы йөртүчесе тимер юл аркылы чыгу урынына килеп кергән. Нәтиҗәдә, пассажир поездының 9 вагоны рельстан чыкты. 

«Якынча мәгълүматлар буенча, 20 вагонның тугызы һәм электровоз рельстан чыккан. Поездда 812 кеше булган. Зыян күрүчеләр турындагы мәгълүматка төгәллек кертелә. Урында ашыгыч хезмәтләр эшли. Оператив штаб төзелгән», – дип хәбәр итте Волгоград өлкәсе губернаторы Андрей Бочаров.

Соңгы мәгълүматлар буенча, 100дән артык кеше хастаханәгә озатылган. Хакимияттә вазгыятьнең махсус контрольгә алынуын билгеләп үттеләр.