Комада яткан танылган фигуристның хәле үзгәргән

Фигуралы шуу буенча Олимпия чемпионы Роман Костомаров аңына килә башлаган, әмма тулысынча терелү өчен вакыт кирәк. Бу хакта хәл белән таныш чыганакка сылтама белән РИА Новости хәбәр итә.

"Роман инде әкренләп хәрәкәтләнә дә ала. Тик тулысынча ушына килү өчен вакыт кирәк, әмма уңай динамика бар", — дип белдергәннәр мәгълүмат агентылыгына.

Исегезгә төшерәбез, 10 гыйнварда Роман Костомаров үпкә ялкынсынуы белән реанимациягә эләгә, соңрак Коммунаркада хастаханәгә күчерелә. Спортчы авыр хәлдә булган, шуның аркасында аны медикамент комага кертергә һәм ЭКМО аппаратына тоташтырырга туры килгән. 7 февральдә хәбәр ителгәнчә, табиблар аяк табаннарын ампутацияләү буенча операция уздырганнар.

фото: https://www.tatar-inform.ru