Матбугат ветераннары: «Картаямыни соң йөрәк?»

Анда "Шәһри Чаллы", "Көмеш кыңгырау" газеталарында, "Мәйдан" журналында эшләп лаеклы ялга чыккан хезмәттәшләребез җыелды. Алар төзекләндерелгән редакция бүлмәләре белән танышты, күптән күрешмәгәннәре бер-берсенең хәлен белеште.  

Бәйрәм чәй табыны янында дәвам итте. Ветераннарыбызны ТАТМЕДИА АҖ филиалы җитәкчесе, “Шәһри Чаллы” газетасының баш редакторы Резидә Юсупова сәламләде.

“Сез - матбугатны оештыруда көчегезне керткән, башлап йөргән кешеләр. Сез матур традицияләр салгансыз – коллективта кеше бер-берсен хөрмәт итә, ярата, бер-берсенә ярдәм итә, берсенең уңай якларын күрсә, икенчесе шуңа омтыла. Ничектер рәхәт атмосфера. Сезнең эшне без дәвам итәбез. Өч басма - "Шәһри Чаллы", "Көмеш кыңгырау", "Мәйдан"ны бергә алып барабыз. Без моның яхшы якларын эзлибез. Сүзгә килешмичә эшлибез – иң мөһиме шул. Сездән өйрәнгән, каләмнәре оста яшьләр бар. Чаллыда безнең язмаларның киләчәге бар. Үзебезне республика басмаларыннан кайтыш дип санамыйбыз. Хәзер дә анда барып эшләрдәй кешеләребез бар, Аллага шөкер”, - диде ул. 

Кунакларыбыз оста баянчы Фәнилә Салиховага кушылып, "Картаямени соң йөрәк?" җырын башкардылар, эш дәверендә булган кызыклы һәм гыйбрәтле хәлләрне искә алдылар. Ахырдан, әзерләнгән күчтәнәчләрдән күңелләре тулып, рәхмәт әйтеп таралыштылар.