Наил Мәһдиев: «Кеше аз хезмәт хакына эшләргә тиеш түгел!»

«Кеше аз хезмәт хакына эшләргә тиеш түгел! Түли алмыйсың икән, эшеңне яп!» – ди Наил Мәһдиев. Чаллыда чираттагы шәһәр Советы утырышы узды. Анда шәһәр бюджетына керемнәр турында сүз барды. Хезмәт хакы түләү буенча «узыш» барган чорда кешегә аз түләү дөрес түгел, ди мэр. Хезмәт хакының кешегә генә түгел, шәһәр бюджетына тәэсире зур.

Чаллыда 4 мең 200дән артык яңа эш урыны булдырылды. Хезмәт хакы 127 процентка артты. Шул сәбәпле физик затларга салымнар да 26 процентка арткан. Узган ел шәһәр бюджетына 7 млрд 99 млн сум кертелгән. 

Наил Мәһдиев үрнәк итеп «Хаер» заводын китерде. 9 ел эчендә әлеге предприятие шәһәр казнасына 36 млрд сумнан артык акча салым түләгән. 

«8 ел эчендә 6 завод төзеделәр. 4 меңнән артык эш урыны булдырылды. Моннан тыш алар белән кече эшмәкәрләр дә хезмәттәшлек итә. Телевизор, суыткыч һәм башка продукцияләре өчен аерым җиһазлар җитештерәләр. Катыргы-кәгазь комбинаты җитәкчелеге дә сөенә, упаковка өчен тартмалар белән тәэмин итәбез диләр. Завод төзегәнче күпме сүз чыкты?! Кытай кешеләрен кертәләр, чайна таун (Кытай шәһәре) ясаячаклар дип тавыш куптардылар. Берничә Кытай кешесе генә эшли анда, калганнары гел безнекеләр», – ди мэр Наил Мәһдиев. 

«Хаер» компаниясе алгарышлы социаль-икътисади үсеш территориясенә (ТОР) керә. ТОРда барлыгы 50 компания. Предприятиеләрнең 86 проценты – Россиянеке. 5-6 предприятие генә чит илнеке.

«ТОРда эшлүче эшмәкәрләрнең 60 проценты – Чаллы кешеләре. Яхшы бит. Безгә киләчәктә дә бу юнәлештә эшләргә кирәк. Өстәмә керемнәр булмаса, социаль бурычларыбызны үти алмас идек. СВОда катнашучыларның гаиләләренә ярдәм итү, шәһәргә эшкә килгән табибларга фатир алуга 500 мең сум түләү һәм башка чыгымнарны күтәрә алмас идек. Безнең төп бурычыбыз – өстәмә керемнәр булдыру», – диде мэр.