Көрәшче Рәнис Гыйләҗетдинов бүләк ителгән машиналарын кая куя?

– Рәнис, хәлләрең ничек?

– Аллаһка шөкер генә. Кәефләр дә әйбәт. Әле менә мэр белән очрашуда булдык, безне хөрмәт итеп чакырганнары өчен рәхмәт. 

– Сине исемең белән дә әйтмиләр ахрысы, гел кушамат белән, дөресме? 

– Әйе, «Гелик» диләр миңа. Шул «Гелендваген» машинасы кебек мощный булгангадыр бәлки, аннары фамилияләр дә охшаш бит. Хәзер Татарстанда гына түгел, бөтен Россиядә Гелик буларак беләләр мине. Шунысы кызык: күп кеше исемемне чыннан да белми. 

– Быел нинди ярышларда катнаштың? 

– Иң мөһиме БРИКС уеннары дип саныйм. Көрәш буенча Дөнья чемпионатында, Дөнья Кубогында чыгыш ясадым. 

– Иң рәхәт ярыш кайда булды? 

– Иң якыны – Чаллы Сабан туе. Аны бернинди дөньякүләм ярышлар белән дә чагыштырып булмый. Рәхәтләнеп үзебезчә гади итеп көрәшү Чаллыда гына. Аннары герой-шагыйрь Муса Җәлил призына ярышларда катнашу да зур дәрәҗә. Гомумән, Татарстанда көрәшкәндә гел арымыйм да, туймыйм да мин, ничектер майлап-җайлап кына бара. 

– Санап киткән ярышларда беренчелекне яулап бардың бит! 

– Әйе, шулай. Һәрберсенә олы әзерлек белән бардым. Бу җиңүләр артында нәрсә торганын үзем генә беләм. 

– Бу сезонда ничә машина оттың? 

– Өч машинам булды: ике «Лада Гранта» һәм бер «Веста».   

– Аларны нишләтәсең? 

– Мин беренче тапкыр гына машина отмыйм бит. Алдагы елларны җиңгәннәрне сата бардым, әти-әнигә ярдәм иттем. Быелгыларын да сатарга исәп. Без авылда җир алган идек. Йорт төзибез. Машиналар саткан акча йорт төзүгә кереп бетәчәк. 

– Рәнис, русча итеп әйткәндә син безнең «завидный холостой» егет бит. Йөргән кызың бармы? 

– Сөйгән ярымның исеме Чулпан. Минзәлә ягыннан. 

– Өйләнергә уйлыйсыңмы? 

– Алла теләсә, әлбәттә.  

– Уңышлар сиңа, Рәнис!