Спасс ярминкәсендә хатын-кызлар кылыч белән сугышачак

3,4,5 августта Алабугада XVII Бөтенроссия Спасс ярминкәсе уза. Аның үзенчәлекләре турында Алабуга Дәүләт музей-тыюлык генераль директоры, Россиянең атказанган мәдәният хезмәткәре Гөлзадә Руденко сөйләде:  

– Быел Россиянең төрле төбәкләреннән килгән кул эшләре осталарының агачтан, киҗе-мамык, күн, керамика, металлдан һәм башка материллардан ясалган әйберләрен Алабуганың тарихы өлешендә сатып алып булачак. Ә «Яшьләр» стадионында тәмле ризыклар сату оештырыла. «Александровский сад»та бал ярминкәсе була, – диде ул. 

Спасс ярминкәсе көннәрендә бард музыкасы яратучылар өчен 3 августта Александр паркында «Вдохновение» фестивале оештырыла. Фестивальнең махсус кунагы – Россиянең атказанган сәнгать эшлеклесе Григорий Гладков. 

Шишкин буалары мәйданчыкларында да мәдәни программа әзерләнә.

Тагын бер яңалык: 3 августта Шишкин буалары территориясендә хатын-кызлар арасында кылыч белән сугышу күнекмәләре буенча ярышлар уза. Анда ике дистәдән артык кеше катнашыр дип көтелә. Мавыктыргыч ярышлар 10 сәгать 30 минутта башлана.