Татарстанда «Үз һөнәрендә иң яхшысы» Бөтенроссия бәйгесенең төбәк этабы уза

Татарстанда «Кадрлар» илкүләм проекты кысаларында «Үз һөнәрендә иң яхшысы» Бөтенроссия һөнәри осталык бәйгесенең төбәк этабы ярышлары башланды. Бу хакта республиканың Хезмәт, халыкны эш белән тәэмин итү һәм социаль яклау министрлыгы матбугат хезмәтендә хәбәр иттеләр.

Бәйге бөтен төбәк буенча 23 һөнәри компетенцияне үз эченә ала. Мәйданчыклар республиканың әйдәп баручы предприятиеләре һәм мәгариф оешмалары базасында оештырылган.

Бәйгенең төбәк этабы 1 апрельдә КДАУ кырларында агрономнар ярышыннан башланып китте һәм августта Җәлил бистәсендә бульдозер машинистлары ярышлары белән тәмамланачак.

Ведомство мәгълүматлары буенча, катнашуга гаризаларны белгечләр үзләре тапшыра ала. Шулай ук кандидатның Россия гражданины булу һәм кимендә 3 ел стажы булу шарты белән аларның эш бирүчеләре дә тапшырырга мөмкин. Вакыты һәм шартлар белән «Үз һөнәрендә иң яхшысы» бәйгесенең рәсми сайтында танышырга мөмкин.

Бәйгедә классик эшче һөнәрләр — токарьлар, фрезерлаучылар, эретеп ябыштыручылар, ташчылар, шулай ук киләчәктәге технологик һөнәрләр вәкилләре – робот техникасы буенча белгечләр һәм пилотсыз очкычлар операторлары катнаша ала. Оештыручылар махсус операция ветераннары һәм эшчәнлек юнәлешен үзгәртергә һәм яңа белгечлек үзләштерергә карар кылган гражданнар өчен булдырылган «Икенче старт» номинациясенә аерым игътибар бирделәр.

Катнашучыларның осталыгын 156 абруйлы эксперт бәяләячәк. Алар – эш бирүчеләр, профсоюзлар, уку йортлары һәм башкарма хакимият органнары вәкилләре. Төбәк этабында җиңүчеләрне медальләр, статуэткалар һәм илнең иң көчле осталары арасында Татарстанны тәкъдим итү өчен бәйгенең федераль этабына юллама белән бүләкләячәкләр.

Федераль этапта һәр номинация буенча призерларга зур акчалата бүләкләр каралган: I урын өчен – 1 000 000 сум, II урын өчен – 500 000 сум, III урын өчен – 300 000 сум.

2025 елда Татарстан бәйгенең федераль этабында 20 номинациянең 18ендә тәкъдим ителде. Барлык федераль этаплар йомгаклары буенча республика вәкилләре 2 беренче, 2 икенче һәм 3 өченче урынны яулады.

«Үз һөнәрендә иң яхшы» бәйгесен уздыру илнең кадрлар потенциалын ныгыту зарурлыгына бәйле. Аның максаты – катнашучыларның һөнәри үсешенә этәргеч бирү һәм тармакта хезмәт сыйфатын арттыру өчен алдынгы тәҗрибәне тарату.