Уразада сәхәр ашау мәҗбүриме?

Изге Рамазан аена санаулы сәгатьләр калып бара. Бүген кояш баеганнан соң көтеп алган кадерле кунагыбызны каршылаячакбыз. Ястү намазыннан соң мәчетләрдә беренче тәравих намазы укылачак. 1 март таңын бар мөселманнар уразалы килеш каршылаячак. Изге Рамазан ае турында «Җомга иртәсе» тапшыруында шәһәребез имам-мөхтәсибе Әлфәс хәзрәт Гайфуллин сөйләде.  

«Аллаһы Сүбхәнә вә Тәгалә «Бәкара» сүрәсенең 183 аятендә безгә: «И, иман китергәннәр, сездән алдагы өммәтләргә, пәйгамбәрләргә тиеш булган кебек, сезгә дә Рамазан аенда ураза тоту фарыз ителде. Рамазан ае сезнең тәкъвалыкларыгызны белер өчен килә», – дип әйтә. Рамазан - Аллаһка карата тәкъвалыкны, мәхәббәтне арттыра торган шушындый бер гамәл-гыйбадәттер», – ди Әлфәс хәзрәт. 

Беренче тапкыр ураза тотучыларда күп сораулар туа. Шуларның берсе сәхәр ашау белән бәйле. Аны ашау мәҗбүриме? 

«Сәхәр ашау – сөннәт. Сәхәр ашамасаң гөнаһлы булмыйсың. Пәйгамбәребез Мөхәммәд салләллаһу галәйһи вә сәлләм: «Сәхәрдә ашагыз, анда бәрәкәт бар», – дигән. Бер йотым су булса да эчеп куйсаң хәерле. Кайбер кешеләр тора алмыйлар, я йоклап калалар. Андый очракта барыбер ниятләп уразага керергә тиешләр. Йоклап калдым, сәхәр ашамадым, дип уразаны калдырырга ярамый», – ди Чаллы имам-мөхтәсибе. 

«Җомга иртәсе» тапшыруын тулысынча «Шәһри Чаллы»ның вконтактедагы рәсми төркеменнән карый аласыз.