Хуҗасыз кишәрлекләр көннән-көн кими, бәяләр дә арта

– Ел башында сатуда 80 участок торса, бүген аларның 70 проценты сатылып бетте. Февраль башыннан эзли башладылар. Карлар эреде, җир ачылды, хәзер эзләүчеләр саны тагын да артачак. Бүген генә Альбина исемле бер хатын-кыз килде. «Бакча аламмы, юкмы, белмим, помидор үсентесе утырттым инде», – ди ул. Аңа 150 мең сумга ташландык бакчаны саттык, – ди Елена Михайловна.
«Гидростроитель-1» бакчачылык ширкәтендә арзан бәягә кишәрлекләр калмаган инде. 450-600 мең сумлыклары гына бар.
Бакчачылык ширкәте рәисе белән сөйләшеп торган арада тагын ике хатын-кыз килеп керде. Алар да биредә бакча эзләп йөри. Сөйләшеп киттек. Кайчандыр Людмиланың монда участогы булган икән. Ләкин ул аны 2015 елда саткан. 

– Кирәге булмады, шуңа саттым. Без көне буе эштә, ял көне генә анда барып, әйбер үсми бит. Бакчада казынганчы дип отпуск вакытында чит илләргә йөрдек, дөнья күрдек. Ә җиләк-җимеш белән яшелчәне кибеттән дә сатып алып була бит. Шундый принцип белән яшәдек. Ә быел 80 яшьлек әниемне алып килдем. Аңа бакча кирәк, ул фатирда яшәргә теләми. Җәен монда яшәр өчен бакча карап йөрим, – ди Людмила.