Чаллыларны Җиңү паркында солдат боткасы белән сыйладылар (фотолар)

Бөек Җиңүнең 77 еллыгы уңаеннан бәйрәм чаралар Чаллының “Җиңү” паркында да оештырылды. Биредә берьюлы берничә мәйданчыкта ветераннарыбызны хөрмәтләделәр.

Каһарманнарыбызга хөрмәт хисләрен белдерергә шәһәрнең Автозавод районы башлыгы Винер Харисов, шәһәр мәгариф учреждениеләре директорлары килде.  Алар “Геройлар аллеясе” мәйданында урын алган бәйрәм сәхнәсеннән яу батырларына рәхмәт сүзләрен ирештерделәр.

“Чаллы районы җирлегеннән сугышка 14 меңгә якын кеше киткән. Якташларыбызның барысы да фронтның алгы сызыгында илебез азатлыгы өчен каһарманнарча көрәшкән. Бүген инде без ул батыр солдатларны, алар истәлегенә булдырылган әлеге гүзәл аллеядә,  чиксез горурлык һәм хөрмәт хисе белән искә алабыз. Мең-мең  рәхмәт сезгә кадерле ветераннарыбыз ”, - дип изге теләкләрен ирештерделәр алар.

Чара барышында  “Безгә хәтер һәм дан васыять итеп калдырылган” дип исемләнгән  стройда йөрү һәм җыр башкару бәйгесендә  катнашучы мәктәп укучыларын да бүләкләделәр. Әлеге шәһәркүләм үткән конкурста 42 нче мәктәп укучылары командасы җиңүче дип танылды. 

Урында ук шәһәрдәшләребез үзләре дә хәрби осталыкларын сынап карый алдылар. Паркта алар өчен автоматны җыеп-сүтү, солдат киемнәрен кием карау кебек мөмкинлекләр дә булдырылган иде. Шулай ук бәйрәмгә килүчеләр өчен кыр кухнясы да эшләде. Биредә олысы да, кечесе дә бик теләп солдат боткасыннан авыз итте.

Моннан тыш шәһәрдәшләребез Чаллыбызның танылган сәнгать коллективларның җыр-биюләре белән дә хозурлана алды.