ГЭС бистәсендәге госпитальне бары тик ветераннар өчен генә калдырырга мөмкиннәр

Махсус операция башланганнан бирле Чаллыда медицина хезмәте күрсәтү сукмакка салынды. Әгәр юл башында контрактчыларны гражданнар хастаханәләренә кабул итү буенча сораулар булса (мобилизацияләнгәннәрне БСМПда һәм поликлиникаларда проблемасыз кабул итә иделәр), хәзер система камил рәвештә көйләнгән. Сугыш ветераннары госпитале базасында куәтле блок булдырылды. Анда махсуслаштырылган 408нче кабинет эшли – анда бары тик хәрби хәрәкәтләр ветераннарын гына кабул итәләр. Чиратлар юк, яралануларның үзенчәлекләрен һәм сугышчыларның психологик халәтен бик яхшы аңлыйлар. Шулай да хәрби хәрәкәтләрдә катнашучылар өчен аерым бина кирәк, махсус операция тәмамлангач та, имгәнеп кайтучылар саны күп булачак. Бу хакта «Шәһәрнең СВО ветераннары советы» җитәкчесе Шамил Әюпов сөйләде. Хәзер шундый медицина ярдәме күрсәтүне оештырыр өчен бина карыйлар:

«Шәһәр Советының йомгаклау сессиясендә мин ТР Рәисеннән хәрби хәрәкәтләр ветераннары госпитале өчен аерым бина бүлеп бирүдә ярдәм сорадым. Чөнки хәзерге бинада ветераннар дәваланудан тыш, Кама аръягы төбәгенең тернәкләнү үзәге дә урнашкан. Аның ничә процент икәнен белмим, әмма бинаның зур өлеше нәкъ менә шул үзәк белән алынган. Шуңа күрә мин Рәистән яңа бина сорадым. Хәзер бу юнәлештә актив эш алып барыла: 8нче комплекстагы госпитальне тулысынча хәрби хәрәкәтләр ветераннары өчен бушатыргамы, яисә медицина шәһәрчегендәге элеккеге перинаталь үзәк бинасын тулысынча хәрби катнашучылар өчен үзгәртеп корыргамы дигән сораулар карала.» , – дип сөйләде Шамил Әюпов.

 «Шәһәрнең СВО ветераннары советы»ның 1 еллык эшчәнлеге турында тулырак интервьюны Моннан укый аласыз.