С витаминының зыяны бармы?

Салкын тию вакытында күпләр С витамины ярдәмендә иммунитетны ныгытырга һәм вируслардан сакланырга тырыша. С витаминының организмга ничек тәэсир итүе турында югары категорияле табиб-терапевт Алексей Водовозов түбәндәгеләрне сөйләде.

–  Фәнни тикшеренүләр күрсәткәнчә, С витамины вируслы инфекцияләрне дәвалау һәм профилактикалау өчен яраклы түгел, гәрчә бу микронутриентның салкын тиюгә каршы көрәше турындагы миф әлегә кадәр шактый популяр булса да – ди ул –
С витамины нинди дә булса авыруларга каршы профилактик һәм терапевтик чара буларак эшләми. Витаминнар – азык ингредиенты, һәм алар авитаминоздан башка берәр нәрсәдән дәваласа, бик сәер булыр иде. С витамины җитмәү сәбәпле реаль авитаминоз – ул цинга, аның очраклары сирәк, гадәттә, алар каты авырулар белән бәйле була.

Шулай ук, табиб С витаминының зыяны турында да әйтте. Бу компонентны үз эченә алган препаратларны даими кабул итү сидек юлларында таш барлыкка килүгә китерергә мөмкин, ди ул.