Ринас Әхмәтов сәхәр белән ифтарда ничек туклана? Җырчы серләрен чиште

Шәһәрдәшебез, татар эстрадасының танылган җырчысы Ринас Әхмәтов та уразага кергән. “Ел да әлеге гыйбадәтне үтәргә тырышам. Моннан якынча ун ел элек беренче тапкыр Рамазан аенда ашау-эчедән тыелып торган идем. Шөкер, Аллаһ ризалыгы өчен дип ниятләгәч, бик авыр булмады”, - дип хәбәр итте Ринас “Шәһри Чаллы” газетасына. Җырчының сәхәр һәм ифтар вакытларында ризык кабул итүгә кагылышлы бернинди сере дә юк. “Табында булганын барын да ашыйм, сайланып тормыйм. Иң мөһиме - хәләл булсын”, - ди җырчы.

Бүгенге көндә исә “Алтын барс” премиясе лауреаты яңа җыр яздырып йөри.  Ул Мөслим районы Елгабаш авылына багышланган булачак. “Киләчәктә, Аллаһ теләсә, дини темага да берәр матур җыр иҗат итәргә уйлым”, - ди шәһәрдәшебез.

Фото җырчының шәхси архивыннан.

Тагы да кызыклырак яңалыклар, фото һәм видеолар «Шәһри Чаллы»ның MAX каналында (язылыгыз).