Шәһри Чаллы

Яр Чаллы шәһәре

18+
2024 - Гаилә елы
Көн темасы

Хәния Фәрхи һәйкәл булып туган ягына кайта (эксклюзив фото)

Ул үзе исән-сау вакытта халыкның яраткан җырчысы иде. Вафатыннан соң да шулай булып калды. 

Бүген татар эстрадасына үзенең моңы, бар яктан матурлыгы белән ташкын булып килеп кергән Хәния Фәрхинең туган көне. Бүген аңа 62 яшь тулган булыр иде. Әмма ул 57 яшендә мәңгелек иленә китте. Ул үзе исән-сау вакытта халыкның яраткан җырчысы иде. Вафатыннан соң да шулай булып калды. Социаль челтәрләрдә тамашачыларының аны сагынмагын көне юк.

Без - "Шәһри Чаллы"лылар газетабыз битләрендә Хәния Фәрхи турында истәлекләрне даими биреп барабыз. 27 майда аның чираттагысы чыкты. 

Җырчының туган көнендә Югары Тәтешледә Хәния Фәрхи иҗатына багышланган: «Онытылыр димә» дип исемләнгән җыр фестивале була. Бер төркем артистлар җырчының туган ягына искә алу чараларында катнашырга дип киттеләр.

Бүген тагын бер мөһим вакыйга була: Югары Тәтешледә Хәния Фәхигә һәйкәл ачыла. Бу – җырчының гаиләсе, тамашачылары һәм туганнары өчен шатлыклы да, горурланырлык та вакыйга. Апасының исемен мәңгеләштерүгә бик күп көч сарыф иткән Фирүзә Ибәтуллина хисләре белән уртаклашып: « 30 май – иң күркәм, иң матур көн. Кояшым минем, син бит туган якның иң түренә, үзәгенә җырчы сандугач булып мәңге сайрарга кайттың. Ходайга мең шөкер, Тәтешле урамын бизәп, сөеклемнең һәйкәле кайтты. Иншаллаһ дим, рәхмәт, мең рәхмәт таштан җан өргән осталарга, мең рәхмәт Кояшымны мәңгелеккә туган ягына кайтаруга матди ярдәм күрсәткән изге, газиз җаннарга.  Мин һаман да синең белән яшим. Яныңда хезмәт көнем үтә, синең турында сөйләп җаным талпына. Синсез бер көн түгел, бер сәгать үтмәс кебек иде... Сине югалтудан җаннар куырылды, йөрәкләр ярсыды, елый-елый күзләрнең нуры гына түгел, күрү сәләте дә бик күпкә начарланды.  Синең фото-сурәтеңне күрер өчен, күз нурлары, синең моңлы тавышыңны ишетергә зирәк колак тавышы, ярсып елаганда юатучы, өзелеп сагынганда башымны куяр өчен син юксың шул, син юксың. Әмма, син минем җаным да, һәрбер күзәнәгем дә, йөрәгем дә, иң мөһиме:  хәтеремдә якты йолдыз - Кояшым булып балкыйсың яшисең, яшьнисең. Җаннарың тыныч, рухларың шат булсын Кояшым» – ди.

Фирүзә Ибәтуллина апасы – легендар җырчы Хәния Фәрхи җырларын башкаручы җырчыларга, аны хәтерләрендә саклаучы тамашачыларга, исемен мәңгеләштерүгә зур өлеш керткән һәркешегә рәхмәтле.

Безнең белән бергә булыгыз. Хәния Фәрхинең туган көне уңаеннан оештырылган чаралардан фотолар һәм хәбәрләр, истәлекләр сайтыбызда тагын булачак.

Зөлфия Галим. 

Фотолар Алия Гәрәевадан һәм Гөлшат  Мөбәрәковадан  алынды.

Хәния Фәрхи турында "Шәһри Чаллы"да гына басылып чыккан иң кызыклы материалларны түбәндәге сылтамалардан кереп укыгыз.

1. Хәния Фәрхинең ерактагы якын дусты ул

2. Хәния Фәрхигә һәйкәл куялар

3. "Хә­ни­ям­нең ки­түе бе­лән һич ки­ле­шеп бул­мый шул"

4. "Хәния апам минем дә җырчы булуымны тели иде"
 

Следите за самым важным и интересным в Telegram-каналеТатмедиа


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: пенсия ана капиталы закон бала пенсионер акча идексация